Me merggts ganz düttlig, s isch Advänt
Lueg wie alles ummerennt
Alls wo me uff d Wiehnacht wetti
Schnäll me no go kaufe setti
Zugger, Fleisch, vyl gueti Sache
Zem Koche, Broote, Kueche bache
Spiilzüg, Gutzi, Pumperniggel
Chrischtbaumschmugg und Schärzartiggel
Für dr Maa e Calvados
Jeemerli, d Hünd sinn jo no duss
Und au die mien d‘ ässe haa
Graad hani d Lischte doch no ghaa!!!
D Fraue hetze dure Laade
D Wäägeli sinn überlaade
Denn renne si hai dr Kuchi zue
Dert finde si erscht rächt kai Rueh:
Bohne fäädle, Broote baize
Pfanne butze, Oofe haize
Linggs und rächts mien si sich weere
D Kinder mien no s Värsi leere
Dr Babbe schlurft in Käller aabe
E Fläsche Wyy go füüregraabe
Uss de Pfanne schiesst dr Dampf
Gottfriedstutz isch das e Grampf
Es isch scho halber Nacht, o Graus
Jetz kunnt au no dr Santiglaus
S Chaos isch jetz heiloos grooss
S Remidemi goot erscht loos
Dr Jonas –li singt „Stille Nacht“
D Mona het in d Hoose gmacht
Dr Babbe het scho Oel am Huet
D Mamme hofft, s wird alles guet
Dr Santiglaus, dä hett verbarme
Mit de Fraue, däänen arme
Aer brummt, eso ka das nyt syy
Und paggt kains vo de Kinder yy
Kurz druff sitzen alli froo
Singe „Tannenbaum“ im Choor
Und warte voller Ungeduld
Bis dr göttlig Sääge kunnt.
E schöne Wienacht und e sichere Uebergang ins neue Joor
Wünscht vo Härze, Evelyne