> Zurück

Schnitzelbank-Zedel des Barbara Club, Alti Garde

Barbara Club, Basel 27.03.2019

 

 

 

Dr Schampedyss vo Haagedaal schafft jeede Daag bim Migros z Bâle, doch hitt, am Mittwuch, macht er blau, sy Scheff bim Migros waiss das au,
denn z Hääsige isch hitte Määrt,
daas isch uf jeede Fall dr wärt. 

 

Am Mittwuchmorge stygt me glyy ins Auti vor der Diire yy.
Dr Schampedyss als Schooffèèr het sy gwoonte Blatz im Camionette,
denn gumpt sy Hindli wie ne Blitz rächts vorne uf e Nääbesitz
und d Zimmerlinde Josefine
muess wäg däm Baschter hinde yyne. 

 

E Halbstund speeter kunnt me aa.
Dr Schampedyss, als rächte Maa,
stygt uus und goot diräggt in d Baiz,
- dää Edelzwigger het sy Raiz.
Nur d Josefin isch nit pressiert.
Si nimmt e Däsche und spaziert
ganz gmietlig umme und studiert,
waas me am Määrt doo offeriert. 

 

Dää Maa doo in däm wysse Kittel,
isch nit e Doggder uus em Spittel,
dää het e Stand und bietet aa,
waas me fir d Gsundhait mache kaa:
Zem Byspiil Puder fir in d Sogge,
denn blyybe d Schaiche warm und drogge, und Drepfli geege Aggsleschwaiss,
die ryybt me yy, am beschte haiss,
e Pflaschter, wo bi Gluggsi nitzt
und au vor Schwangerschafte schitzt,
e Saft, wo Hueschte linderet
und Hoor-Uusfall verhinderet.
Bi styffem Hals hilft guet und schnäll dää Balsam und e Katzefäll,
und geege Kopfwee nutzt elai
daas Kissi, gfillt mit Kirsischtai. 

 

Jetz kauft die liebi Josefine
Banaane, Epfel, Mandarine,
Radyysli, Choucroute, Pommes de terre, e Gugelhopf und „Fruits de mer“.
Vom Minschterkääs, wo stinggt und lauft, wird graad e ganzes Kilo kauft.
Daas alles und e Hampfle Fyyge
duet d Josefin in d Däsche byyge,
und „Eau-de-vie“, wo nit vyyl koschtet, wird nääbem Suurgrut yyne gmoschtet. 

 

Bim Määrtstand, wo me Kääs ka haa, beglaagt sich d Mamme Meriaa:
Mit iirem Alte dääts nit stimme,
denn znacht im Bett, doo kenn er nimme. Ebs nit emänd e Mittel gääbti, dass däm sy Wirmli wiider lääbti.
Doo maint dr Kääs-Maa: „Daasch kai Sach, y waiss doo Bschaid, y bii vom Fach:
Am beschte nutzt e Pfäfferkääs,
zem Byspiil dää doo, faiss und rääs.
E jeede Daag drvoo e Stigg,
isch Gold wärt firs Familie-Gligg
und wurdi hälfe, ass am Ändi
au däm syy Pfyfli wiider ständi.“ 

 

Am Noomidaag isch s Volgg am bummle, doo hèèrt me Marsch-Muusig und Drummle. S sinn Sapeurs Pompiers, wo marschiere und e Parade dùùrefiere.
Ganz vorne laufe Majorette,
wo iiri Steggli schwinge sette,
doch dääre z hinderscht rutscht emänd
das bleede Steggli uus de Händ.
Si rennt em nooch, si muess sich bugge und spienzlet iire blutte Rugge.
Dr Schampedyss luegt unverfrore
und griegt vom Josefin an d Oore. 

 

 

Dr Schampedyss isch baff und frogt: „Hesch sicher Hunger, wo di blogt,
zem Apéro isch hegschti Zyt,
deert ääne d Wirtschaft isch nit wyt“.
Die baide kèère freelig yy
und siirpfle gnabb e Liter Wyy
und dräffe denn (– bim Zeedeldichte
kaasch uf die Pointe nit verzichte –)
per Zuefall, per saumässige
dr Pfaarer, dää vo Hääsige... 

 

Fasnacht 2019