Vo Alpha bis Omega

Zerscht hät is d Alpha-Variante vom Corona-Virus bös verwütscht. Durch s Impfe hä mer si endli noch de dritte Welle bis im Auguscht schier usgrottet gha. Aber do isch scho lengscht d Deltavariante bi uns ufblüeht gsi un hät is die vierti Welle bschert. Schiint s hän die au no gföhrliche Beta- und Gamma-Variante zwütschgedin neumen anderscht ihri Opfer gsuecht.

Un jetz si mer uf eimool bi de Omikron-Variente. Dass d Lambda- und d My-Variante furchbar z Peru un z Kolumbie zuegschlage hän, weiß jo chuum öbber bi uns. Un was isch mit de Epsilon-, Zeta-, Eta-, Theta-, Jota-, Kappa- un de Ny- un Xi-Variante gsi?

Omikron. Was isch s A un O, d Quintessenz vo däre Gschicht? Nün Buechschtabe hät s griechischi Alphabet no bis zum ewiglange, endgültige O, zum Omega. „Alpha un Omega“, Gott un Christus: „der Erste und der Letzte, der Anfang und das Ende“ stoht in de Johannis-Offebarig in de Bible: „der Anfangende und Abschließende, der Schöpfer und der Vollender, aus dem und zu dem alles wird.“

Wieviil Macht hä mir no über unsi Wirklichkeit? Was chunnt noch em Omega? Dürfe mer nomool bim en andere Alpha neu afange? Woher d Zueversicht näh? Viil Glück, un einewäg: E guets Neus!

Markus Manfred Jung